Masallı Olimpiya İdman Kompleksində yunan-Roma güləşi üzrə veteran güləşçilər arasında dünya çempionatının gümüş medalçısı, Azərbaycan və Rusiya çempionu, beynəlxalq turnirlərin mükafatçısı Elgiz Məmmədovla görüş keçirilib. Bu haqda məlumatı Cenublu.az bu gün, 28 noyabr tarixində Masallı rayon Gənclər və İdman İdarəsinə istinadən verir.
Masallı Rayon Gənclər və İdman İdarəsinin rəisi Sabiq Cahangirov Elgiz Rafis oğlu Məmmədov haqqında tədbir iştirakçılarına məlumat verib, layihənin təşkilində əsas məqsədin uşaq, yeniyetmə və gənclər arasında idmana marağın artırılması, sağlam həyat tərzinin təbliği olduğunu diqqətə çatdırıb. Daha sonra uşaq, yeniyetmə və gənc idmançılarla yunan-Roma güləşi üzrə ustad dərsləri keçirilib.
Qeyd edək ki, carı ilin oktyabr ayında Bolqarıstanın Plovdiv şəhərində veteranlar arasında yunan-Roma güləşi üzrə dünya çempionatında Azərbaycanı təmsil edən 35 yaşlı pəhləvanımız Elgiz Məmmədov 88 kiloqram çəki dərəcəsində mundialın gümüş medalına sahib olub. Final mərhələsinəcən üç rəqibini məğlub edən Elgiz həlledici görüşdə qazaxıstanlı Andrey Samoxinlə mübarizədə bir xal fərqi ilə xalçadan ayrılıb. Noyabrın əvvəllərində isə Çelyabinsk şəhərində keçirilən veteran güləşçilər arasında açıq Rusiya çempionatının qalibi olub.
Masallı rayonunun Ərkivan qəsəbəsindən olan Elgiz Məmmədov güləş məşqlərinə Azərbaycanda Masallı Rayon Gənclər və İdman İdarəsinin məşqçi-müəllimi, əməkdar məşqçi Qardaşxan Əmənovun rəhbərliyi ilə başlayıb. O, 9 yaşı olanda ilk uğuruna imza atıb – SSRİ idman ustası, Azərbaycanın əməkdar məşqçisi Nadir Ağayevin xatirəsinə həsr olunmuş yunan-Roma güləşi üzrə respublika turnirinin qalibi olub. 2000-2009-cu illər ərzində dəfələrlə yeniyetmə və gənclər arasında Bakı şəhər və Azərbaycan birinciliklərinin qalibi adını qazanan Elgiz Dağıstanda, İranda və digər ölkələrdə keçirilən yunan-Roma güləşi üzrə beynəlxalq turnirlərin mükafatçısı olub.
Elgiz Məmmədov hazırda Rusiyada yaşayır. Kalininqrad şəhərində məşqçilik fəaliyyəti ilə məşğuldur. Yetirdiyi yeniyetmə və gənc yunan-romaçılar bir sıra mötəbər yarışların mükafatçılarıdır.
