Masallı Voleybol məktəbinin yetirmələri Azərbaycan birinciliyində mükafatlandırılıblar. Bu haqda məlumatı Cenublu.az bu gün, 28 iyun tarixində Masalı rayon Gənclər və İdman İdarəsinə istinadən verir.
Belə ki, 15+ yaşlı idmançılar arasında keçirilən çimərlik voleybolu üzrə Azərbaycan çempionatının I mərhələsində "Azərreyl" komandasını təmsil edən Masallıdan olan Elmin Alışanov və komanda yoldaşı Asif Əliyev "Neftçi" komandasına qalib gələrək gümüş medala sahib olublar.
Həmçinin "Neftçi-2" komadasında çıxış edən Masallı Voleybol məktəbinin yetirməsi Ülvi Rəcəbli komanda yoldaşı Heydər Məmmədli ilə "Murov AZ TERMİNAL-2" komandasına qalib gələrək bürünc medala sahibləniblər.
Qarşılaşmalardan sonra qaliblərin mükafatlandırılma mərasimi baş tutub. Mərasimdə AVF-nin baş katibi Faiq Orucov, İdarə Heyətinin üzvü Elqar Bağırov iştirak ediblər. Azərbaycan çempionatının (I mərhələ) qaliblərinə medal, diplom və pul mükafatı verilib.
Qeyd edək ki, qarşıdakı günlərdə birinciliyin növbəti mərhələləri də keçiriləcək.
