Masallı idmançıları Bakıda təşkil olunanan qaydasız döyüş üzrə Respublika turnirində iştirak ediblər. Bu haqda bu gün, 23 fevral tarixində Cenublu.az Masallı Rayon Gənclər və İdman İdarəsinə istinadən xəbər verir.
Paytaxt Bakı ilə yanaşı, respublikanın şəhər və rayonlarından 200-ə yaxın güclü döyüş ustalarının iştirak etdiyi yarışlarda Masallı idmançıları uğurlu nəticə göstəriblər. Üç nəfərlik heyətlə təmsil olunan “Masallı Fight Klubu”nun hər üç yetirməsi medal qazanıb.
Maraqlı və gərgin mübarizə şəraitində keçən MMA döyüşlərinin yekun nəticələrinə əsasən, Masallı idmançılarından Mirhüseyn Bağırov (38 kq) bütün rəqiblərinə qalib gələrək fəxri kürsünün ən yüksək pilləsinə qalxıb. Eyyub Kərimov (63 kq) ikinci, Sübhan Hüseynli (27 kq) isə üçüncü yerə layiq görülüblər.
Qalib döyüşçülər müvafiq dərəcəli medal və diplomlarla mükafatlandırılıblar. Həmçinin “Masallı Fight Klubu”nun (M.F.C MMA) rəhbəri Rəmzi Bağırov MMA əlbəyaxa döyüş növünün inkişafındakı xidmətinə görə aidiyyəti federasiya rəhbərliyi tərəfindən diplomla təltif edilib.
