Masallıda keçirilmiş "20 Yanvar" şəhidlərinin xatirəsinə həsr olunmuş minifutbol turnirinin qalibləri müəyyən olub. Bu haqda məlumat Masallı Rayonu Gənclər və İdman İdarəsinin rəsmi İnstagram hesabında paylaşılıb.
10-13 yaşlı idmançıların qatıldığı yarışmada Masallıdan 5, Bakıdan 3, Cəlilabad rayonundan isə 4 komanda iştirak edib. "Viləş" minifutbol stadionunda keçirilən yarışmada rayonlar üzrə dövlət qurumlarının əməkdaşları, Vətən müharibəsi iştirakçıları Ceyhun Qurbanov, Həmid Mənsimov, Daməd İbrahimli və başqaları iştirak ediblər.
10 yaşlılardan ibarət yarışmada “UGİŞM” (Masallı) komandası 1-ci yerə, "Azad FK" (Masallı) 2-ci, "UGİŞM" (Cəlilabad) 3-cü yerə sahiblənib.
13 yaşlılardan ibarət yarışmada isə Bakının "Azəri" futbol klubu 1-ci yerə layiq görülüb.
Turnirdə ən çox qol vurduğuna görə Ən sərrast oyunçu adına "UGİMŞ" FK oyunçusu Eltun Məmmədov, Ən yaxşı qapıçı adına isə "UGİMŞ" FK oyunçusu Qurban Əliyev layiq görülüblər.
Şəhid Əzizov Elvinin övladı Əzizov Ayhanın komandası birinci yerin sahibi olduğu üçün, Ayhana turnirdə xüsusi olaraq diplom, medal və gödəkcə hədiyyə edilib. Yarışmada uşaqlar topun üzərinə öz imzalarını ataraq Vətən müharibəsi qazilərinə hədiyyə ediblər.
