Masallıda yunan-roma və sərbəst güləş növləri üzrə rayon açıq turniri keçirilib. Bu haqda məlumat bu gün, 17 yanvar tarixində Masallı rayon Gənclər və İdman İdarəsinin rəsmi İnstagram hesabında paylaşılıb.
"20 yanvar" şəhidlərinin xatirəsinə keçirilən müsabiqədə 18 çəki dərəcəsində 210 nəfərə yaxın idmançı iştirak edib. Turnir Masallı rayon Olimpiya İdman Kompleksində idman idarəsinin təşkilatçılığı ilə baş tutub.
20 Yanvar şəhidlərinin xatirəsini əziz tutmaq, uşaq və yeniyetmələri idmana cəlb etmək məqsədi ilə keçirilən turnirin qalibləri diplom və medallarla təltif olunublar.
Tədbirdə 20 yanvar şəhidlərinin və vətən uğrunda canından keçmiş bütün şəhidlərimizin əziz xatirəsi bir dəqiqəlik sükutla yad edilib.
