15 dəfə Respublika, 1 dəfə Avropa və 1 dəfə Dünya çempionu adına layiq görülən Ruzanna Məmmədova haqda məlumatı oxucularımıza təqdim edirik.
Məmmədova Ruzanna Səxavət qızı 22 iyun 2006-cı ildə Masallı rayonunun Mişkəmi kəndində anadan olub. 2012-ci ilin may ayından Bakı şəhəri Hövsan Olimpiya İdman kompleksində idmanın sərbəst güləş növü üzrə məşqlərinə başlayıb. İlk qələbəsi 2013-cü ildə Şağan Olimpiya İdman kompleksində Heydər Əliyevin xatirəsinə həsr olunmuş yeniyetmələr arasında keçirilən yarışda olub. O, 23 kq çəki dərəcəsində mübarizə apararaq 1-ci yerə layiq görülüb.
R.Məmmədova yeniyetmələr arasında keçirilən Respublika yarışlarında 15 dəfə 1-ci yerə, 3 dəfə 2-ci yerə, 2 dəfə 3-cü yerə layiq görülüb. Hal-hazırda Azərbaycan Güləş Federasiyasının qadınlardan ibarət milli yığma komandasının fəal üzvlərindən biridir.
2022-ci ildə Türkiyənin Antalya şəhərində yeniyetmə (U-17) güləşçilər arasında “Victory cup” turnirində Ruzanna Məmmədova (49 kq) qadınlar arasında sərbəst güləş üzrə gümüş medala layiq görülüb.
2022-ci ildə İtaliyanın paytaxtı Roma şəhərində keçirilən sərbəst güləş üzrə U-17 dünya çempionatında 49 kq çəki dərəcəsində dünya Çempionu adına layiq görülüb.
16 iyun 2022-ci il tarixdə Rumıniyanın paytaxtı Buxarestdə güləş üzrə U-17 Avropa çempionatında sərbəst güləşçilər arasında 49 kiloqram çəki dərəcəsində Ruzanna Məmmədova qızıl medal qazanaraq Avropa çempionu olub.
