Lənkəran-Astara Regional Gənclər və İdman İdarəsinin rəisi Teymur Babazadə Tokioda keçirilən sumo güləşi üzrə dünya çempionatında II yeri tutan Cəlilabaddan olan idmançı Royal Ağamalıyevlə görüşüb. Bu haqda məlumatı Cenublu.az bu gün, 17 noyabr tarixində verir.
Görüş Lənkəran-Astara Regional Gənclər və İdman İdarəsində keçirilib. Burada Teymur Babazadə güləşçini təbrik edib. O bildirib ki, regionun gənc idmançılarının qazandığı qələbə böyüyən gənc nəslin sağlam həyat tərzinə və idmana olan marağını artırır.
Qeyd edək ki, Royal Ağamalıyev 1998-ci ildə Cəlilabad rayonunda anadan olub. O, perspektivli idmançı kimi bir sıra beynəlxalq səviyyəli yarışlarda iştirak edib.
Belə ki, Ağamalıyev 2022-ci ildə Polşada keçirilən Avropa Çempionatında II yerə, Estoniyada keçirilən Avropa kuboku yarışında isə I yerə layiq görülüb.
Royal Ağamalıyev hazırda Azərbaycan Dövlət Bədən tərbiyəsi və İdman Akademiyasının tələbəsidir.
