Karateçi qardaşlar Avropa çempionatında yüksək nəticə qazanıblar. Bu haqda bu gün, 8 aprel tarixində Cenublu.az Cəlilabad Rayon Gənclər və İdman İdarəsinə istinadən xəbər verir.
İsveçin Goteburg şəhərində yığma komandanın heyətində Cəlilabad rayonundan olan qardaşlar, Səlahət və Əliqismət Həsənovlar kyokuşin karate üzrə Avropa Çempionatında iştirak ediblər. 85 kq çəki dərəcəsində çıxış edən Səlahət Həsənov gərgin keçən görüşlərdə ispan, gürcü, alman və ukraynalı idmançılara qalib gələrək final oyununa vəsiqə qazanıb. Final görüşündə bolqarıstanlı əfsanəvi döyüşçü Valeri Dmitrovla mübarizədə məğlub olaraq, gümüş medala sahib çıxıb.
65 kq çəki dərəcəsində çıxış edən Əliqismət Həsənov litvalı, gürcü, ukraynalı və polyak rəqiblərinə qalib gələrək qızıl medal qazanıb. Əliqismət Həsənov ən yüksək kürsüyə qalxaraq, Azərbaycanın Himnini səsləndirib.
Qeyd edək ki, sərt karate növü sayılan kyokuşin üzrə dünya çempionu adını ilk dəfə Azərbaycana 2017-ci ildə Səlahət Həsənov gətirib.
Qardaşlar qələbələrini Cəlilabad rayonundan olan şəhid Səid Həsənova həsr ediblər.
