Bu gün, 8 aprel tarixi Mirzəyev Bəhruz Şakir oğlunun doğum günüdür.
Bəhruz Mirzəyev 1988-ci ildə Masallı rayonunun Viləş kəndində anadan olub. O, Seyran Hacıyev adına orta məktəbin 9-cu sinfini bitirib.
Səhhətində problemlər 17-18 yaşında yaranmağa başlayıb. Artıq 26-27 yaşlarında əlil arabasına oturmağa məcbur qalıb. O, əzələ distrofiyası, miopatiya xəstəliyindən əziyyət çəkir və bu xəstəliyin müalicəsi yoxdur.
2016-cı ildə Bəhruz 1 saylı Sağlamlıq imkanları məhdud gənclərin Peşə Reabilitasiya Mərkəzinə gedir və orada dostundan boccia idman növü haqda məlumat alır. Daha sonra Birinci Qarabağ Müharibəsi əlili olan baş məşqçi İlham Məhərrəmovla tanış olur və beləliklə, boccia ilə məşğul olmağa başlayır. 2018-ci ilin mart ayından - Leyla Əliyevanın təşəbbüsü ilə Boccia İdman Federasiyasının yarandığı ilk gündən federasiyaya qoşulub.
Hal-hazırda Azərbaycan Respublikası Milli Paralimpiya Komitəsinin boccia idman növü üzrə milli komandasının üzvü və kapitanı, boccia idman növü üzrə Avropa Çempionu, ikiqat Azərbaycan çempionu, dəfələrlə beynəlxalq səviyyəli yarışların – açıq regional turnir, açıq çempionat və qitələrarası çempionatın qızıl medal sahibidir. O, 2018-ci ildə boccia üzrə ilin ən yaxşı paralimpiyaçısı adına layiq görülüb.
