“Xəzər-Lənkəran” futbol klubu 2004-cü ildə Lənkəran şəhərində “Palmali” Şirkətlər Qrupunun sahibi, əslən Masallıdan olan Mübariz Mənsimovun təşəbbüsü ilə yaradılıb.
Klubun ilk oyunu 7 avqust 2004-cü ildə Tovuzda “Turan” klubuna qarşı olub. Bu matç 1:1 hesabı ilə başa çatıb [2]. 2007-ci ildə “Xəzər-Lənkəran” futbol klubu Azərbaycan çempionu və Azərbaycan Kubokunun, həmçinin 25 yanvar 2008-ci ildə MBD ölkələri arasında keçirilən “Birlik” Kubokunun, 24 may 2008-ci ildə ikinci dəfə, 2010-cu ildə isə üçüncü dəfə Azərbaycan Kubokunun sahibi olub. Komanda 2010, 2011 və 2012-ci il mövsümlərini gümüş medalla başa vurub. Futbol klubu 23 oktyabr 2013-cü ildə Bakının “Neftçi” komandasına 2:1 hesabı ilə qalib gələrək, Superkubokun qalibi olub.
“Xəzər-Lənkəran” futbol klubu əsas komanda olaraq, 2016-cı ildən Azərbaycan çempionatlarında iştirakını dayandırıb. Lakin aşağı yaş qrupları üzrə isə fəaliyyətini davam etdirir [1].
2006-cı ildə Lənkəran şəhərində “Xəzər-Lənkəran” futbol klubu üçün köhnə stadionun yerində yenisi inşa edilib [6]. İdman jurnalisti Hüseyn Cəbrayıloğlu bu haqda demişdir: “Mənsimovun 2006-cı ildə köhnə stadionun yerində inşa etdirdiyi stadion və baza hətta MDB-də ən müasir arena sayılırdı. Kluba artıq bütün MDB-də, hətta Avropa arenasında ləqəb də verilmişdi - Qafqazın “Çelsi”si” [5].
“Qəbələ” futbol klubunun məşqçisi olmuş Yuri Syomin ən çox azarkeşə malik komandanın “Xəzər Lənkəran” olduğunu söyləyərək qeyd etmişdir: “”Qəbələ”də çalışdığım dövrdə “Xəzər Lənkəran”la səfər oyunlarımızda həmişə anşlaq olurdu. Lənkəranlı azarkeşlər həmişə stadionda inanılmaz atmosfer yaradırdılar” [4].
2009-cu ildə “Xəzər-Lənkəran” futbol klubunun Lənkəran şəhərindəki Xəzər Lənkəran Mərkəzi stadionunda muzeyi açılıb. Bu, Azərbaycanda futbol klubuna məxsus ilk muzey olub [3].
Ədəbiyyat:
