Salam Elvar bəy, zəhmət olmasa oxucularımıza özünüz haqda məlumat verərdiniz. Neçə yaşından güləş idman növü ilə məşğulsunuz?
Salam. Mən Elvar Nehmətzadə, yanvarın 15-i 2001-ci ildə Lənkəran rayonunun Qurunba kəndində anadan olmuşam. 15 yaşımdan güləş idman növü ilə məşğul oluram.
Niyə məhz güləş?
Əslində öncədən həvəsim karateyə idi, güləş haqda heç bir məlumatım yox idi. Daha sonra Əli Ağayev Qurunba kəndində güləş zalı açdı. Mən də özümü bu idman növündə sınamaq qərarını aldım.
Milli güləş və kəmər güləşi ilə məşğul olursunuz. Yunan-roma və kəmər güləşi ilə eyni zamanda məşğul olmaq sizə çətinlik yaradır?
Deməzdim ki çətinlik yaradır. Çünki ikisi də eyni nəsildən olan idman növləridir. Yunan-roma növü üzrə güləşən idmançı, rahatlıqla kəmər güləşində də özünü sınaya bilər.
İdman cəmiyyətində idolunuz varmı?
Xeyr, idolum özüməm.
Bir sıra beynəlxalq yarışlarda iştirak etmisiz. Sizin üçün ən çətini hansı olub?
Ən çətin qarşılaşmam Rusiyanın Kazan şəhərində keçirilən l MDB oyunlarında oldu. Finala gedən yolda rus idmançı ilə qarşılaşan zaman mənə qarşı haqsızlıq etdilər. Həmin rəqibi udsaydım, finalda idim. Amma qismət - bürünc medal ilə döndüm Vətənə.
İdman karyeranızda nələri əldə etmək istəyirsiniz?
Hər bir idmançının olduğu kimi, arzum Olimpiya çempionu olmaqdır. Əzəmətli turnirin adını eşidəndə gözlərim yaşarır.
İdmanla məşğul olmaq istəyən oxucularımıza nə məsləhətlər verərdiniz?
İlk növbədə idman sağlamlıqdır, idmana başlamaq üçün əsas səbəb sağlamlıqlarını qorumaq olmalıdır. Daha sonra isə idman sahəsində uğura gedən yolda qətiyyətli və səbrli olmalarını istəyərdim.
