Məşhur astaralı məşqçinin yubileyi olub. Bu haqda məlumatı Cenublu.az bu gün, 3 iyul tarixində verir.
Əməkdar bədən tərbiyəsi və idman xadimi, Azərbaycan idmanına yetirmələri ilə töhfəsini vermiş, rayonun idman ictimaiyyətinin ağsaqqalı, dövlətimizin yüksək mükafatlarına layiq görülmüş Tofiq Həmidov 75 yaşını qeyd edib.
Bununla əlaqadar Astara Rayon Gənclər və İdman İdarəsinin rəisi Rufan Şirinov və müavini İqrar Cəfərov yubilyarın qonağı olublar. Ona idarənin Fəxri Fərmanı təqdim edilib.
Tofiq Həmidov 2 iyul 1948-ci ildə Ərçivan qəsəbəsində anadan olub. O, həyatının 50 ilini idman sahəsinə bağlayıb. Karyerasını 1971-ci ildə məktəbdə bədən tərbiyəsi müəllimi kimi başlamış Həmidov 1972-1992-ci illərdə Astara Uşaq-Gənclər İdman Məktəbində sərbəst güləş üzrə məşqçi-müəllim, 1992-2016-cı illərdə məktəbin direktoru, 2016-2020-ci illərdə dərs hissə müdiri vəzifələrində çalışıb. Yetirmələri Aslan Ağayev, Nadir Həmidov və digərləri SSRİ, Avropa və Dünya birinciliklərininin qalibi olublar.
Qeyd edək ki, Tofiq Həmidov “Azərbaycan SSR Əməkdar məşqçisi”, “Azərbaycan Respublikasının Fəxri Bədən Tərbiyəsi və İdman işçisi”, “Əməkdar bədən tərbiyəsi və idman xadimi” fəxri adlarına layiq görülüb.
