Astara Dənizkənarı Park Bulvar Kompleksində hər həftəsonu keçirilən “İdman hamı üçün” layihəsinə dəstək və eləcə də rayonda yeniyetmə və gənclər arasında sağlam həyat tərzini kütləviləşdirmək məqsədilə “Street workout” (Açıq hava fitnesi) üzrə idman yarışları və idman etüdləri keçirilib. Bu haqda məlumatı Cenublu.az bu gün, 5 sentyabr tarixində verir.
Yeniyetmə və gənclər top çiləmə, turnik, paralel qollarda hərəkət, uzanaraq dayaqda qolların açılıb bükülməsi, pres üzrə güclərini sınamış, minifutbol və Savat (Fransız boksu) üzrə qızışdırıcı idman hərəkətləri, idman etüdləri yerinə yetiriblər.
Təlim-məşqlərin təşkilində məşqçi-müəllimlərdən “Astara Aslan” Əlbəyaxa Döyüş Klubunun direktoru Zamin Baxşıyev Savat (Fransız boksu) üzrə, Astara Uşaq Gənclər İdman-Şahmat Məktəbinin Futbol bölməsinin məşqçisi, AFFA-nın Həvəskar komandaları arasında Region Liqasında Astara komandasının baş məşqçisi Qəhrəman Mirzəyev futbol üzrə master-klas nümayiş etdiriblər.
Yekunda iştirakçılara Astara RGİİ-nin sertifikatları təqdim olunub.
Qeyd edək ki, tədbir Gənclər və İdman Nazirliyinin, Astara Rayon Gənclər və İdman İdarəsinin təşkilatçılığı, Astara Uşaq Gənclər İdman-Şahmat Məktəbinin Futbol bölməsinin, “Astara Aslan” Əlbəyaxa Döyüş Klubunun dəstəyi ilə keçirilib.
