Astarada Xocalı Soyqırımı şəhidlərinin xatirəsinə həsr olunmuş sərbəst güləş üzrə açıq rayon turniri keçirilib. Bu haqda məlumatı Cenublu.az bu gün, 27 fevral tarixində Astara rayon Gənclər və İdman İdarəsinə istinadən verir.
Astara Olimpiya İdman Kompleksində keçirilən turnirdə 11 komanda - Astara, Lənkaran, Gəncə, Masallı, Cəlilabad, Biləsuvar, Salyan, Sabirabad, Abşeron, ”Arena” (Bakı), ROİL (Bakı) şəhər və rayonlarının idman klubları, idman cəmiyyətlərini təmsil edən 320 nəfər idmançı fəxri yerlər uğrunda mübarizə aparıb.
Yarışda Astara Olimpiya İdman Kompleksinin direktoru, Azərbaycan Respublikasının Əməkdar məşqçisi Aslan Ağayev, Beynəlxalq dərəcəli hakimlər Sevinc Yusubova və Zaur Şərifov, Azərbaycan Respublikasının Əməkdar məşqçisi, yarışların baş katibi İlham Məmmədov, Astara RGİİ-nin aparıcı məsləhətçisi Ələskər Əskərov və digər nümayəndələr, məşqçilər iştirak ediblər.
Sonda müxtəlif çəki dərəcələrində I, II və III yerləri qazanan idmançılar Astara Olimpiya İdman Kompleksinin təsis etdiyi diplomlar və medallarla təltif olunublar
