Astarada şəhid polkovnik-leytenant Nail Orucovun xatirəsinə həsr olunmuş karate yarışı keçirilib. Bu haqda bu gün, 28 noyabr tarixində Cenublu.az Astara Gənclər və İdman İdarəsinə istinadən xəbər verir.
“Zirvə” Beynəlxalq idman klubunda Kontakt Karate idman növü üzrə turnir təşkil olunub. Yarışmanın açılış mərasimində Astara Rayon Gənclər və İdman İdarəsinin rəisi vəzifəsini icra edən Rufan Şirinov, Azərbaycan Kontakt Karate Federasiyasının prezidenti Ruslan Abbasov, Şəhid polkovnik-leytenant Nail Orucovun oğlu Ruslan Orucov, yarışların baş katibi, Azərbaycan Kontakt Karate Federasiyasının cənub zonası üzrə təlimatçı-məşqçisi və digərləri çıxış ediblər. Yarışmanın əvvəlində şəhidlik zirvəsinə ucalan həmvətənlərimizin xatirəsi bir dəqiqəlik sükutla yad edilib.
Yarışlar əsasnaməyə uyğun olaraq, Beynəlxalq Kontakt Karate döyüş qaydalarına uyğun 3 versiyada - Kontakt, Kyokuşin kenbukay, Jissenkay versiyalarında müxtəlif yaş və çəki dərəcələri üzrə keçirilib.
Turnirdə Bakı şəhərini (5 klub-“Katana”, “Alov”, “Kempo”, “Oyama”, “Qarabağ” İdman Klubları) və Astara (2 komanda-“Seiken” Kyokuşin Karate Klubu, “Astara Aslan” Əlbəyaxa Döyüş İdman Klubu ), Masallı, Biləsuvar, Cəlilabad, Yardımlı, Lənkəran rayonlarını təmsil edən ümumən 12 idman klubunu təmsil edən 162 nəfər idmançı fəxri yerlər uğrunda mübarizə aparıblar.
Sonda müxtəlif çəki dərəcələrində I, II və III yerləri qazanan idmançılar Astara Rayon Gənclər və İdman İdarəsinin, Azərbaycan Kontakt Karate Federasiyasının diplomları və medalları ilə təltif olunublar.
