Astara rayon İcra Hakimiyyətinin başçısı Qəzənfər Ağayev Astara güləş məktəbinin yetirməsi, sərbəst güləş üzrə Avropa çempionu Rzazadə Əliabbas Hafis oğlunu qəbul edib. Bu haqda bu gün, 25 aprel tarixində Cenublu.az Astara RİH-yə istinadən xəbər verir.
İdmançını təbrik edən icra başçısı ona əldə etdiyi nailiyyətlərin ölkəmiz və gənclərimiz üçün faydalı olması haqda danışıb.
Sərbəst güləş üzrə Avropa çempionu Əliabbas Rzazadə növbəti dəfə səmimi qəbula və xoş sözlərə görə icra başçısı Qəzənfər Ağayevə minnətdarlıq edib. O qeyd edib ki, 2007-ci ildən güləşlə məşğuldur. 2013-cü ildən Azərbaycan yığma komandasının üzvüdür. 2014-cü ildə sərbəst güləş üzrə yeniyetmələr arasında Respublika çempionu olub, gənclər arasında 2016-cı ildə Rumıniyada keçirilən Avropa və Fransada keçirilən dünya çempionatlarında bürünc medal qazanıb. 2018-ci ildə İtaliyada keçirilən Avropa çempionatında bürünc, 2021-ci ildə Makedoniyada keçirilən U-23 Avropa çempionatında gümüş, Serbiyada keçirilən U-23 dünya çempionatında qızıl medala sahib olub. 2022-ci ildə Macarıstanın Budapeşt şəhərində keçirilən Avropa çempionatında gümüş medal, Türkiyənin Konya şəhərində keçirilən İslam Həmrəyliyi Oyunlarında bürünc medal qazanıb, İtaliyanın Roma şəhərində keçirilən Qran-Prinin çempionu olub.
“2023-cü ilin fevralında Xorvatiyanın paytaxtı Zaqreb şəhərində keçirilən Qran-Prinin çempionu və apreldə həmin şəhərdə keçirilən sərbəst güləş üzrə Avropa çempionatında qızıl medal qazanmışam. İndi də sentyabrda keçiriləcək dünya çempionatına hazırlaşıram. Ən böyük arzum dünya çempionatı və Olimpiya Oyunlarında qalib gələrək Azərbaycanın Dövlət Himnin səsləndirilməsi və Bayrağımızın ucaldılmasına nail olmaqdır”, - deyə Ağayev əlavə edib.
İcra başçısı Əliabbas Rzazadəni bir daha təbrik edib, ona gələcək yarışlarda uğurlar diləyib, Fəxri Fərman və qiymətli hədiyyə ilə mükafatlandırıb.
