Divəlonə nekropolu Lənkəran rayon mərkəzindən 1,5 km şimal-qərbdə, Digah kəndi ərazisində yerləşir. Qəbiristanlıq tunc və ilk dəmir dövrünə aid edilir.
Əfsanəyə görə, Divəlonə “Divlər məskəni” olub. Belə əfsanələrə səbəb isə son tunc və ilk dəmir dövründə siklopik (divlərə və təpəgözlərə aid) tikililərin olmasıdır. Ehtimal edilir ki, bu səbəbdən abidə bu adı alıb.
Nekropolun ərazisi 6 hektardan çoxdur. Qəbiristanlıq sərdabə, daş-qutu və torpaq qəbirlərdən ibarətdir. Buradakı bəzi qəbirlərin üstündə kurqanlar var [2].
Divəlonə qəbirisanlığında, əsasən, tunc silah nümunələri (yəhərvari başlıqlı uzun qılınclar, saplaqlı qılınc tipləri, xəncər, “Zaqafqaziya tipli” ox ucluqları), müxtəlif formalı tunc bilərziklər, tunc asma muncuqlar və s. tapıntılar aşkar edilmişdir. Aşkar olunan tapıntılar qəbiristanlığın Talış-Muğan mədəniyyətinə aid olduğunu göstərir [1].
Divəlonə nekropolu ölkə əhəmiyyətli arxeoloji abidələr siyahısına daxildir [3].
Ədəbiyyat:
