Sığdaş kəndi Masallı şəhərindən 10 km cənub-qərbdə, Viləş çayının sahilində yerləşir.
Bu kəndin ilk adı Sığdəşt (Sıqdəşt) olub [3,4]. Toponim “sığ” və “dəşt” sözlərinin birləşməsindən düzəlib [3]. “Sığ” talış dilindən tərcümədə “daş”, “dəşt” isə fars və talış dillərindən tərcümədə “çöl” deməkdir, yəni toponim “daşlı çöl” mənasını daşıyır [5].
Tarixçi Mirzə Əhməd Mirzə Xudaverdi oğlu “Əxbarnamə” əsərində Sığdaş kəndinin əhalisi haqda qeyd edib: “Siqdəşt əhalisi..çох igid adamlar idi. Оnlardan biri də rəhmətlik Mirzəcan bəy idi. Allah şahiddir. Оnun kimi igid dünyaya gəlməmişdi və bu gündən sоnra da gəlməyəcəkdir”. Bundan əlavə, tarixçi öz əsərində Sığdaş kəndinin əhalisinin Mir Mustafa xanın oğlu və Talış xanlığının hakimi olan Mir Həsən xana dəstək olaraq, onun tərəfində düşmənlərə qarşı vuruşması haqqında bəhs edib [4].
Sığdaş kəndində bir çox tarixi abidələr mövcuddur: Mürsəlli ocağı, Sığdaş kənd məscidi, ləm və s. Bu kənddə olan abidələrin əksəriyyəti XIX əsrə aid edilir [6].
1859-1864-cü ilə aid olan siyahıyalınmaya görə, Sığdaş kəndində 339 nəfər yaşayıb [1]. 2009-cu ilin statistik göstəricilərinə əsasən, kənddə 1505 nəfərin yaşadığı qeydə alınıb [2].
Ədəbiyyat:
