770 nömrəli Yaşıl aptek 1980-ci illərdə Masallı rayonunda yaradılıb. Bu yer SSRİ-nin ilk botanika apteklərindən biri hesab edilir.
Burada Masallının Yaşıl aptekinin ərazisində bitən, həmçinin rayonun müxtəlif yerlərindən toplanan bitkilərlə insanlar müalicə edilirdi.
Müalicəvi bitkilərin əkilməsi üçün Yaşıl aptekə meşə yaxınlığında 5 hektar torpaq sahəsi ayrılmışdır. Yaşıl aptekin ərazisindəki bağın qurucusu masallılı “Korol” ləqəbi ilə tanınan Rauf Məcid oğlu Rəhimovdur. O, əczaçı və bioloq peşəsi üzrə təhsil alıb. Rəhimov bir müddət Yaşıl aptekdə işləyərkən burada müalicəvi bitkilərlə yanaşı, yeni bitki növlərinin yetişdirilməsi ilə də məşğul olurdu. Bağın ərazisində 800-dən çox ağac və gül növü bitirdi, həmçinin 200-ə yaxın quş növü yaşayırdı.
Sovet İttifaqı Kommunist Partiyası Mərkəzi Komitəsinin işçiləri Rauf Rəhimova Bakıdakı İçərişəhərdə Yaşıl aptek açmağı məsləhət görmüşdülər. Lakin o, bununla razılaşmadı. Buna səbəb isə müalicəvi bitkilərin sağlam və təmiz atmosferdə və torpaqda yetişməsidir.
