Bakı şəhərində yaşayan müəllim həftənin 3 günü Astaraya, ucqar kənddə uşaqlara təhsil vermək üçün gəlir. Bununla bağlı xəbər bu gün, 3 yanvar tarixində APA-da paylaşılıb.
Astaranın ucqar dağ kəndlərindən biri olan Mikidə, Zümrüd Ağayeva biologiya fənnini tədris edir. Zümrüd xanım artıq 3 aydır bu məktəbdə çalışır.
Hər həftə kilometrlərlə yol qət edən müəllim öz işindən zövq aldığını qeyd edir.
"Həftənin 3 gününü Astarada keçirirəm, yerdə qalan 4 gününü isə Bakı şəhərində, öz evimdə keçirirəm. Məhz bu işə müəllimliyi sevdiyim üçün gəlmişəm. Düzdür, maaşım bilindiyi kimi o qədər də çox deyil. Bizə əvvəllər Təhsil Nazirliyinin H1 və H2 - məsafəyə görə verilən müəyyən məbləğ var idi. Hal-hazırda həmin məbləğ var, sadəcə olaraq məndə yaş 35-i keçdiyinə görə mənə həmin məbləğ təyin olunmur", - deyə Zümrüd xanım qeyd edib.
Zümrüd Ağayeva qeyd edir ki, Miki kəndində özünü yad kimi hiss etmir. O, işə qəbul olduqdan sonra kənd sakinləri ona təmənnasız qalmağa ev də veriblər.
