Vilipard körpüsü Astara rayonunun Lomin kəndində yerləşir. Körpünün tikilmə tarixi təxminən XIII əsrə aid edilir. Körpü, həmçinin “Vilopard” kimi də adlandırılır.
Yerli əhali arasında bu körpü haqqında bir rəvayət mövcuddur [1]. Əfsanəyə görə, Sasani şahı Ənuşirəvan bir gün ova çıxır. Lakin keçdiyi yolda olan çayın üzərində körpü olmur. Ona görə də qoşun çay dərəsindən keçməli olur. Bir müddət sonra o, geri qayıdarkən çayın üzərində təzə körpü görür və qoşunun durmasını əmr edir. Ənuşirəvan şah vəzirini göndərir ki, körpünün kim tərəfindən tikildiyini öyrənsin. Vəzir şaha belə bir xəbər gətirir ki, burada Vili (Vilo) adlı bir qadın yaşayırmış və o, vəsiyyət edib ki, camaat onun satdığı yumurtaların puluna bu körpünü inşa etsin. Qadının ölümündən sonra yerli ustalar onun vəsiyyətini yerinə yetiriblər [2]. Həmin ustalar körpünü tikən zaman onun bünövrəsinə doqquz axça (gümüş pul) qoyurlar ki, gələcəkdə təmirə ehtiyac olanda onlardan istifadə olunsun [1].
Bunu eşidən Ənuşirəvan şah qəzəblənərək deyir: “Qarı öz gücünü mənə göstərib”. Şah və onun qoşunları çay dərəsindən keçib yollarına davam edirlər. Sonradan Ənuşirəvan çay üzərində yeni körpünün inşasına əmr verir. Həmin ərazidə çayı adlamaq üçün “Sipiyəpard” (Ağ körpü) inşa edilir və şah hər zaman çayı keçərkən məhz bu körpüdən istifadə edir [2]. İndi də Ənuşirəvanın nəslindən olanlar yalnız “Sipiyəpard”dan keçərlər [1].
Hal-hazırda əhalinin istifadəsində olan Vilipard körpüsü taxtadan inşa olunub [2].
Ədəbiyyat:
