Şəmi dayı el arasında “Şəminin parkı” kimi tanınan, əslində isə Milli qəhrəman Əsgər Əliyevin adını daşıyan parkın yaranma tarixçəsindən danışır.
86 yaşlı Şəmi dayı bildirir ki, bu parka 1961-ci ildə gəlib və park o zamanlar çox baxımsız, kol-kos içində olub.
Bir gün icra başçısı buradan keçəndə, görür ki, park pis vəziyyətdədir. O, Şəmi dayının və Mənzil Kommunal İstismar İdarəsinin rəisini (o zaman Komxoz adlanırdı) çağırır və onlara bildirir ki, 1 ay ərzində parkı səliqə-sahmana salmalıdılar. Belə də olur.
Daha sonra Şəmi dayı pul yığaraq velosiped alır və kirayə verməyə başlayır. Karuselləri işə salır və insanların parka axınını təmin edir. Mütəmadi olaraq Mənzil Kommunal İstismar İdarəsindən əməkdaş gəlir və parkın təmizliyini saxlayır.
Bir müddət sonra icra başçısı İsa Məmmədov buradan keçəndə görür ki, park tər-təmizdir. Maşını saxlayır, düşüb parka girir. Şəmi dayını çağırır və soruşur ki, parkı bu vəziyyətə kim gətirib. Şəmi dayı deyir ki, özü. Bu hadisədən sonra icra başçısı parka Şəmi dayının adını qoyur.
Qeyd edək ki, vaxtilə bu parkda rəsm qalereyası, parkla üzbəüz isə dahi bəstəkar Müslüm Maqomayevin fin üslubunda olan evi də olub. Hər iki tikili daha sonra sökülüb.
