Faiq Əliqulu oğlu Cəfərov 1 may 1974-cü ildə Cəlilabad rayonunun Şiləvəngə kəndində anadan olub.
O, 1982-1991-ci illərdə Şiləvəngə kənd orta məktəbində təhsil alıb. Məktəbi bitirdikdən sonra Cəfərov Bakı Maşınqayırma Texnikumuna daxil olub.
Faiq Cəfərov 1992-ci ilin sentyabr ayında Sərhəd Qoşunları Baş İdarəsinin Naxçıvan Sərhəd Dəstəsində hərbi xidmətə başlayıb [2]. O, Naxçıvan sərhəd dəstəsinin ilk sərhədçilərindən biri olub. Cəfərov Şərur rayonunda olan 3-cü zastavada 3 il xidmət edib.
13-17 mart 1995-ci ildə Azərbaycanda hərbi çevrilişə cəhd hadisəsi baş verir. Həmin zaman Naxçıvan sərhəd dəstəsi paytaxta köməyə göndərilir. Dövlət çevrilişinə cəhd etmək istəyən qüvvələrin zərərsizləşdirilməsində iştirak edənlər sırasında olan Faiq Cəfərov martın 16-dan 17-nə keçən gecə ağır yaralanır. O, Sabunçu rayonundakı 3 saylı xəstəxanaya çatdırılır. O, 22 iyun 1995-ci ildə sərhəd qoşunlarından ehtiyata buraxılır.
Faiq Cəfərov 27 dekabr 1995-ci ildə “Azərbaycanın Milli Qəhrəmanı” fəxri adına layiq görülüb.
1996-cı ildə qəhrəman yenidən sərhəd qoşunlarına qayıdıb. O, Bakı Əlahiddə Nəzarət Buraxılış Məntəqəsində xidmət edib. 1997-ci ildən Azərbaycan Beynəlxalq Universitetinin hüquq fakültəsində təhsil almağa başlayıb [1].
Faiq Cəfərov 19 avqust 1999-cu ildə avtomobil qəzasında dünyasını dəyişib və Cəlilabad rayonunun Şiləvəngə kəndində dəfn edilib [2].
Ədəbiyyat:
