Azərbaycan və dünya kinosunu ən yaxşı bilən rejissor, Əməkdar incəsənət xadimi Cəmil Quliyev nənəsi Sona Quliyeva haqda xatirələrini paylaşıb.
Bir vaxtlar Lənkəranın ən çox ziyarət edilən yerlərindən biri - “Sonalar bağı” məhz Sona Quliyevanın adı ilə bağlı olub. Bağ 1968-1970-ci illərdə Sona Quliyevanın və yerli əhalinin vəsaiti hesabına tikilib.
Əvvəllər bu bağın ərazisində attraksionlar var idi. Həmçinin SSRİ-nin müxtəlif bölgələrindən gətirilən nadir kollar, güllər əkilmişdi.
Lakin indi… O, sadəcə köhnə nəslin yaddaşlarında qalan “Sonalar bağı”dır və əfsuslar olsun ki, baxımsız vəziyyətdədir.
Qeyd edək ki, Sona Cəmil qızı Quliyeva 1948-ci ildə göndərişlə Lənkərana gəlib və burada Şəhər Sovetinin və Rayon Sovetinin sədrinin müavini, daha sonra sədri vəzifəsində işləyib. O, 1930-1940-cı illərdə Cəlilabad Rayon Sovetinin katibi idi. Sona xanım “Xalqlar dostluğu” və “Şərəf nişanı” ordeni ilə təltif olunub. Sona Quliyeva Böyük Vətən müharibəsində iştirak etdiyinə görə “Qafqazın müdafiəsinə görə”, “Almaniya üzərində qələbə medalı” və s. medallarla təltif edilib. Sona Quliyeva iki dəfə Azərbaycan Respublikası Ali Sovetinin Fəxri Fərmanı ilə mükafatlandırılıb. O, Xalq artisti Hacıbaba Bağırovun anası olub.
Sona Quliyeva 2006-cı ildə 96 yaşında vəfat edib.
