Sizə cənub bölgəsinin 6 rayonunun ilk qəzetləri haqqında məlumatı təqdim edirik:
Lənkəran rayonunun ilk qəzeti “Qızıl Talış” 21 yanvar 1931-ci ildə nəşr edilməyə başlayıb. Bu qəzetin birinci redaktoru Böyükağa Mirsalayev olub. Qəzet 5 dekabr 1931-ci ildən “Sıə Tolış” (talış dilindən tərcümədə “Qızıl Talış”), 23 fevral 1939-cu ildən “Sosialist subtropikası”, 16 iyun 1957-ci ildən “Leninçi”, 22 sentyabr 1990-cı ildən isə “Lənkəran” adı ilə buraxılır [1].
Masallının ilk qəzeti “Yeni həyat” 31 may 1932-ci ildə çap edilib. Qəzet 1962-1965-ci illərdə indiki “Lənkəran” qəzetinə birləşdirilərək nəşr olunurdu. Bu qəzet sonralar “Çağırış”, “Yeni qəzet” adlandırılıb. 5 aprel 2002-ci ildən qəzet yenidən “Yeni həyat” adı ilə nəşr edilməyə başlayır [3].
Astaranın ilk qəzeti “Ostoro kolxozçi” 1932-ci ildə nəşr edilib. “Ostoro kolxozçi” talış dilindən tərcümədə “Astara kolxozçusu” deməkdir [2]. Bu qəzet bir müddət sonra “Kolxoz tribunası”, “Sovet Astarası” adları ilə fəaliyyət göstərib. Hazırda qəzet “Astara” adı ilə nəşr olunur [5].
Cəlilabadın ilk qəzeti “Sosializm tarlaçısı” 1932-ci ildə çap edilib. Bu qəzet sonralar “Taxılçı”, 1990-cı ildən isə “Yeni gün” adlandırılır [2].Yardımlının ilk qəzeti “Vərgədüz kolxozçusu” 1936-cı ildə nəşr edilib [6]. Qəzetin ilk redaktoru Təvəkkül Abbasov olub.
Yardımlı rayonu 1930-1938-ci illərdə Vərgədüz adlandırıldığından qəzet həmin adı daşıyıb. Qəzet 1938-1990-cı illərdə “Yeni kənd”, 1990-cı ildən isə “Zirvə” adlandırılır. Əməkdar jurnalist Sahib Əliyev 32 il (1966-1998) qəzetin baş redaktoru kimi işləyib. Tarixçi İldırım Şükürzadənin məlumatına görə, hazırda qəzet fəaliyyətini dayandırıb [2,6].
Lerikin ilk qəzeti “Zuvand kolxozçusu” 20 may 1937-ci ildə çap olunmağa başlayıb. Lerik rayonu 1930-1938-ci illərdə Zuvand adlandığına görə qəzet də həmin ad altında nəşr edilib. Qəzet 27 iyul 1937-ci ildən “Kolxoz yolu” adı ilə fəaliyyət göstərib. Həmin qəzet 1964-1965-ci illərdə indiki “Lənkəran” qəzeti ilə birləşdirilib [2]. Daha sonra qəzet “Bolluq uğrunda”, hazırda isə “Lerik” adı altında çap olunur [4].
Ədəbiyyat:
Mirhaşım Talışlı, Etibar Əhədov. Lənkəran: ensiklopedik məlumat. Bakı-2017.
