Mehdi bulağı Masallı rayonunun Ərkivan qəsəbəsinin Ramazanlı məhəlləsində yerləşir. Bulaq Mehdi adlı şəxsə məxsus olduğundan bu cür adlandırılıb [2].
Çar Rusiyası zamanı indiki Viləş kəndində yaşayan malakanlar saxsı kəmərlə buradan özlərinə su çəkiblər. Bundan əlavə, Masallının mərkəzində olan Bəyiş quyusu mənbəyini bu bulaqdan götürürdü. Həmin saxsı kəmərlər torpaqqazan texnikalar meydana çıxandan sonra dağıdılıb. Lakin Mehdi bulağını yerli sakinlər qoruya biliblər [1].
Ərkivanın cənub-şərqində, təxminən 15-20 km aralıda, Prişib (Göytəpə)-Lənkəran yolunun sol tərəfində yaşayan rus əhalisi üçün 1904-cü ildə Mehdi bulağından içməli su xətti çəkilmişdir. Həmin su xətti Viləş kəndində yaşayan İvanuşka və Andruşka Broslavsk qardaşları tərəfindən çəkilmişdir. Deyilənlərə görə, qardaşların su çəkəcəkləri ərazinin çəltik əkilən yerlərdən keçməsi Ərkivan əhalisində narazılıq yaradır. Bu səbəbdən Broslavsk qardaşları boruları çəltik sahələrindən 3 metr aralıda quraşdırırlar.
Su xətti Ərkivanın Göllü məhəlləsində yaşayan Mehdi, Hacı Bəşir, Nifti və Kərbəlayi Abas tərəfindən istehsal olunan borularla çəkilmişdir. Mehdi bulağından su xətti çəkilən zaman bir neçə yerdə quyular düzəldilmişdir ki, yoldan keçən insanlar da bu sudan istifadə edə bilsinlər [3].
Hazırda bu bulağın suyundan yerli əhali istifadə edir [1].
Ədəbiyyat:
