Masallı rayonunun Şərəfə kəndindəki Mərasim Evində "Şərəfli döyüş yolu" adlı kitabın təqdimatı keçirilib. Bu haqda məlumatı Masallı rayon İcra Hakimiyyətinin rəsmi Facebook səhifəsi verib.
Şərəfə və Ağakişibəyli kəndlərindən olan şəhidlərə həsr olunmuş kitabın müəllifi Pərvanə Ziyadovadır. Təqdimat mərasimində o söyləyib: "Kitab münaqişə başlandığı gündən qələbəyədək olan bir dövrdə, işğal altında olan torpaqlarımızın azad edilməsi uğrunda canından keçən qəhrəman şəhidlərimizə həsr olunub. Kitabda hər bir şəhid haqqında ətraflı məlumat vardır. Canını torpaq uğrunda fəda etmiş qəhrəmanlar həmişə sayılacaq və onlar daim fəxr mənbəyimiz olacaqlar".
Qeyd edək ki, bu Pərvanə Ziyadovanın ikinci kitabıdır. Müəllifin bundan əvvəlki "Uğurlu həyat hekayəsi" kitabı da geniş oxucu kütləsinin marağına səbəb olmuşdur.
