Masallı rayonunda şagirdlərin iştirakı ilə "Qarabağın incisi Şuşa" adlı rəsm müsabiqəsi keçiriləcək. Bu haqda məlumat Masallı Regional Mədəniyyət İdarəsinin rəsmi Facebook səhifəsində paylaşılıb.
"Şuşa İli" çərçivəsində təşkil olunan müsabiqə Masallı rayon Heydər Əliyev Mərkəzi və Masallı şəhər Onbirillik İncəsənət Məktəbinin birgə təşkilatçılığı ilə keçiriləcək. Mərkəz tərəfindən müəyyənləşdirilən şərtlər aşağıdakılardır:
- Müsabiqədə yalnız rayon ümumtəhsil məktəblərinin şagirdləri iştirak edə bilər;
- İştirakçıların müsabiqəyə təqdim edəcəkləri rəsm işləri minimum A3 vərəq ölçülərinə uyğun olmalıdır;
- Müsabiqə iştirakçıları boya növü və rəsm texnikası seçimində sərbəstdir;
- Rəsmlər yalnız əl işlərindən ibarət olmalı, rəsmlərin hazırlanması zamanı heç bir kompüter və ya digər texnoloji vasitələrin imkanlarından istifadəyə yol verilməməlidir;
- Hər iştirakçı müsabiqəyə yalnız bir rəsm işi təqdim edə bilər.
İştirak etmək istəyənlər 25 fevral tarixinə qədər rəsm işlərini Masallı rayon Heydər Əliyev Mərkəzi və ya Masallı şəhər Onbirillik İncəsənət Məktəbinə təhvil verməlidirlər.
Müsabiqənin ilk 3-lüyü təşkilatçılar tərəfindən diplomla mükafatlandırılacaq. Rəsm işləri Masallı rayon Heydər Əliyev Mərkəzinin rəsmi veb-səhifə və sosial media hesablarında təqdim ediləcəkdir.
