Məktəbəqədər təhsil müəssisələrinə elektron qəbul bu gündən etibarən başlayıb. Bu haqda məlumatı Cenublu.az 18 iyul tarixində Lənkəran-Astara Regional Təhsil İdarəsinə istinadən verir.
Bu gün saat 11:00-dan etibarən 2022-2023-cü tədris ili üçün məktəbəqədər təhsil müəssisələrində uşaqların qəbulu prosesinə start verilib.
Proses 14 sentyabr tarixinədək davam edəcək.
Uşaqların qəbulu “Məktəbəqədər təhsil müəssisələrinə elektron sənəd qəbulu sistemi” vasitəsilə həyata keçiriləcək. Belə ki, valideynlər sistem üzərində qeyd edilən tarix və saatdan etibarən elektron kabinet yaratmaq imkanı əldə edəcəklər.
2 avqust tarixindən etibarən Lənkəran-Astara RTİ-nin əhatə dairəsində olan rayonlarda (Astara, Cəlilabad, Lənkəran, Lerik, Masallı, Yardımlı) valideynlər uşaqlarının məktəbəqədər təhsil müəssisələrinə qəbulu ilə bağlı növbəyə yazıla biləcəklər.
Valideyn tərəfindən yerləşdirilmiş növbələr 1 ay müddətində boş yerlər olduğu halda sorğuya çevriləcək.
Valideyn (qanuni nümayəndə) sorğu qəbul edildikdən sonra 15 gün ərzində sənədləri müvafiq müəssisəyə təqdim etməlidir, əks təqdirdə sorğu sistem tərəfindən silinəcək və növbəli şəkildə başqa uşağın qəbulu aparılacaq.
Elektron qəbul sistemi 15-21 sentyabr 2022-ci il tarixlərində qrupların komplektləşdirilməsi səbəbindən müvəqqəti dayandırılacaq. Komplektləşmə prosesi bitdikdən sonra uşaqların məktəbəqədər təhsil müəssisələrində boş yerlərə qəbulu il boyu davam edəcək.
[caption id="attachment_20061" align="alignnone" width="336"]
Foto Lənkəran-Astara Regional Təhsil İdarəsinin Facebook səhifəsi[/caption]
