“Lənkəran” adlı küçə Rusiyanın Volqoqrad şəhərinin mərkəzində yerləşir.
Volqoqradda həmin küçənin bu cür adlandırılması XIX əsrdə buraya mühacirət etmiş lənkəranlı tacirlərin adı ilə bağlıdır [1]. Həmin vaxt Saritsın adlanan bu şəhərdə yaranmış ənənəyə görə, şəhərətrafı yaşayış məntəqələrinin küçələrinə Rusiya imperiyasının müxtəlif qəza və şəhərlərinin adları verilirdi. Bu ənənənin əsası 1820-ci ildə Saritsının yeni tikinti planı təsdiq edildikdən sonra qoyulmuşdur [2]. Şəhərə ticarət məqsədilə Lənkərandan gələn tacirlərin bir çoxu sonralar burada məskunlaşmışdılar [1].
Böyük Vətən müharibəsi zamanı şəhər Stalinqrad adlanırdı. Bu şəhəri həmin vaxt iki dəfə Sovet İttifaqı Qəhrəmanı general-mayor Həzi Aslanov, snayper Baloğlan Abbasov, bölmə komandiri Ağahüseyn Quliyev və bir çox lənkəranlılar müdafiə ediblər.
Böyük Vətən müharibəsində şəhərin faşistlərdən təmizlənməsində iştirak edənlərin xatirəsini əbədiləşdirmək üçün Volqoqrad şəhərindəki Mamay təpəsində olan abidənin üzərində Baloğlan Abbasovun adı həkk olunub, bundan əlavə, orada Həzi Aslanovun mərmərdən olan xatirə lövhəsi qoyulub [1]. Volqoqrad vilayətinin Oktyabrski yaşayış məntəqəsində Həzi Aslanova aid stel yerləşir [3]. Vaxtilə Volqoqrad şəhərində Həzi Aslanov və Ağahüseyn Quliyevin adını daşıyan məktəblər mövcud olub [1].
“Lənkəran” adlı küçə XIX əsrdən bu günədək Volqoqrad şəhərində yerləşir.
Ədəbiyyat:
