Azərbaycanda qədim sənət növlərindən biri olan həsirçiliyi Cənub bölgəsində yaşadanlar var. Bu haqda bu gün, 16 fevral tarixində Cenublu.az ARB Cənub-a istinadən xəbər verir.
Qədim sənəti yaşadanlardan biri Lənkəran rayonunun Zövlə kənd sakini Mehrinaz Bəşirovadır. O, 30 ildən çoxdur ki, həsirçiliklə məşğuldur.
M.Bəşirovanın sözlərinə görə, həsir toxumaq üçün yaz-yay fəslində qamış toplanılır və iki həftə qurudulur. Bir həsir naxışından, uzunluq və enindən asılı olaraq, 3-5 günə hazırlanır. Həsir toxunan zaman həndəsi fiqurlardan daha çox istifadə edilir. Qamışdan təkcə həsir deyil, eyni zamanda müxtəlif növ zənbillər, tərəzilər, çantalar, papaqlar və digər əşyalar hazırlanır.
Qeyd edək ki, Lənkəran Şəhər Mədəniyyət Mərkəzinin Zövlə kənd sənətkarlıq evində gənclər bu sənəti böyük həvəslə öyrənirlər. Sənətkarlıq evinin rəhbəri Allahyar Əsgərov bildirir ki, günümüzdə həsirçiliklə məşğul olan insanlar var, xüsusən gənclər bu sənətin sirrini öyrənməyə çox həvəslidirlər.
Əziyyətlə başa gələn həsirlərin satış qiymətinə gəlincə isə, kiçik səbətlər 2 manata, böyük səbətlər isə 5 manata təklif olunur.
Hər kəsin sevimlisi olan "Şərikli çörək", "Bizim cəbiş müəllim" və bir çox filmlərdə isitifadə olunan həsir zəmbillər də cənub bölgəsində toxunub.
Daha öncə həsirçilik sənətini yaşadan Astaralı Rüfət Rzayev haqqında ətraflı məlumat vermişdik.
