15-18 yaşlı lənkəranlı oğlanlar üçün 6-9 sentyabr tarixlərində Mingəçevirdə “Gənclər Qız Uşaqlarının Dəyərinin Təşviqi və Gender Bərabərliyi Uğrunda” adlı düşərgə təşkil olunacaq. Bu haqda məlumatı Cenublu.az bu gün, 23 avqust tarixində UNFPA-nın Facebook səhifəsinə istinadən verir.
Düşərgə müddətində iştirakçılar üçün "Cins və gender", "Məsuliyyətli atalıq", "Gender bərabərliyi”, “Gender əsaslı cins seçimi və gender əsaslı zorakılıq” mövzularında təlimlər keçiriləcək. Həmçinin, onlar “Forest School” təhsil konsepsiyasına uyğun olaraq müxtəlif sosial, emosional, fiziki və intellektual fəaliyyətlərə cəlb olunacaqlar. Düşərgədə Lənkəranla yanaşı Qax, Mingəçevir, Bakı, Sumqayıt, Gəncə, Ağstafa və Tovuzdan olan oğlanlar da iştirak edə bilər.
Düşərgənin keçirilməsində məqsəd gənclərin iştirakçılığı yolu ilə qız uşaqlarına münasibətdə cəmiyyətdə mövcud olan stereotiplərin aradan qaldırılmasına və qız övladının dəyərinin təşviqinə dəstək verməkdən ibarətdir.
İştirak üçün qeydiyyat linki: https://bit.ly/3AGVJdB
Qeyd edək ki, düşərgə Avropa İttifaqının maliyyə dəstəyi, BMT-nin Əhali Fondunun təşkilatçılığı və "Forest School Azerbaijan"nın dəstəyi ilə keçirilir.
