Aşağı Nüvədi qəsəbə məscidi Lənkəran rayonunun Aşağı Nüvədi qəsəbəsinin Ayna Sultanova küçəsində yerləşir [4].
İbadətgah XIX əsrə aid edilir [1]. Rusiya imperiyasının hərbi dəftərxanalarındakı 1856-1864-cü illərə aid sənədlərdə bu məscid haqqında belə yazılır: “Aşağı Nüvədi kəndi Lənkəran qəza mərkəzindən 24 verst aralıqda, Zərdəcü çayının qolayırıcında yerləşir. Bu kənddə iki məscid var” [3]. İbadət evinin adı ilk dəfə 1850-1880-ci illərə aid sənədlərdə çəkilir, bundan belə qərara gəlmək olar ki, məscid bundan da əvvəl mövcud olub.
Məscidin giriş qapısından sağ tərəfdə qəbir yerləşir. Həmin qəbirdə bu məscidin axundu olmuş Şeyx Yusif Kərbəlayi Əmir oğlu Viyənli (1860-1948) dəfn olunub [1].
Məscid düzbucaqlı formadadır və kərpicdən inşa edilib. İbadətgahın tavanı taxtadandır və dörd taxta sütun üzərində dayanıb, damı isə kirəmitlə örtülüb. İbadət evinin göy rəngli tağvari formada taxtadan iki giriş qapısı və bir neçə pəncərəsi var. Məscid iki hissəyə bölünür: qadınlar və kişilər şöbəsi.
İbadətgahın minbəri altıguşəlidir və onun üzərində 1913-cü il tarixi qeyd olunub. Minbər üzərində ərəbcə yazılar da var.
Məscid sovet dövründə anbar kimi istifadə olunub. 1985-ci ildən ibadət evinin fəaliyyəti bərpa edilib [2].
Ədəbiyyat:
