Lənkəran Beynəlxalq Hava Limanı Lənkəran şəhərində, Füzuli küçəsində yerləşir [4]. İlk vaxtlar aeroport şəhərin qərb hissəsində, Narbağı adlanan ərazidə, Lənkəran Dövlət Universitetinin indiki 1 nömrəli tədris korpusunun önündə yerləşirdi.
1930-cu ildən Lənkəran-Bakı arasında iki qanadlı təyyarə işləyirdi. 1930-cu illərdə təyyarələrdə məktəblilərin gəzintisi təşkil edilmişdir [1].
Lənkəran aeroportu istismara yararsız olduğu üçün 2005-2008-ci illərdə burada yenidənqurma işləri aparılıb [3]. Tikinti işlərini Türkiyənin “ZEMA” şirkəti həyata keçirib. İlk olaraq aeroport 40 hektardan çox ərazini əhatə edirdi, lakin təmirdən sonra ərazi 325 hektara qədər artırılmışdır.
2009-cu ilin dekabr ayından Moskvaya, 2010-cu ilin iyun ayından Sankt-Peterburqa, 3 iyun 2012-ci ildən Yekaterinburqa, 2014-cü ildən isə İstanbula birbaşa hava reysləri açılıb.
Böyük Vətən müharibəsi illərində aviasiya döyüşlərində iştirak etmiş lənkəranlı təyyarəçilər Qurban Kərimov, Adil Rzayev, Anar Axundov müxtəlif illərdə Lənkəran aeroportunda işləyiblər [1].
2014-cü ilin statistikasına əsasən, həmin il ərzində aeroportun 47889 nəfər şərnişini olub [2].
Ədəbiyyat:
