Əli meydanı ziyarətgahı Lənkəran rayonunun Girdəni kəndində, Lənkəran-Boradigah şose yolunda, Girdəni kəndi ərazisindəki qəbiristanlıqda yerləşir. Ehtimal edilir ki, bu ocaq təxminən VII əsrdə yaranmışdır. Ocağın adı İmam Əli (ə) ilə bağlıdır. Yerli əhali bu ocağı "Əli meydon" adlandırır.
Rəvayətə görə, bu ərazi VII əsrdə ərəb qoşunlarının düşərgəsi olub. Əhali bu ərazini Həzrət Əlinin (ə) istirahət etdiyi yer olduğunu düşünərək "Əli meydanı" adı altında ziyarətgaha çevirib. Lakin bəzi mənbələrə görə, Həzrəti Əli (ə) Ərəbistanda və İraqda yaşayıb, digər ölkələrə səfər etməyib. Ehtimal olunur ki, Əli meydanı ocağı insanların ona olan məhəbbətindən yaranıb.
Ziyarətgah üzərində, Girdəni kənd sakini Rəsmiyyə Bəxtiyar qızı Hüseynovanın şəxsi vəsaiti ilə, 1997-ci ildə türbə inşa edilib.
