Lənkəran şəhərinin Tüədo kəndində “Yolsuzluq” adlı qısametrajlı sənədli film çəkilib.
Film ucqar dağ kəndində ibtidai sinif müəllimi kimi çalışan bir qadının həyatına fokuslanır. O, həyatın bütün çətinliklərinə baxmayaraq, kənd uşaqlarına təhsil verməyə çalışır. Kənddə yol infrastrukturu yoxdur, sosial şərait son dərəcə zəifdir, tibbi xidmət əlçatmazdır və savadsızlıq geniş yayılıb.
Sənədli filmdə müəllimənin dili ilə kəndin acı reallıqları üzə çıxarılır. Xəstələnən uşaqlar vaxtında tibbi yardım ala bilmir, müəllimlər kənddə qalmaq istəmir, yeni müəllimlər isə bu əraziyə gəlməkdən çəkinirlər. Sosial çıxış yollarının məhdudluğu fonunda oğlanlar Rusiyaya işləmək üçün getməyi, qızlar isə erkən yaşda ailə qurmağı yeganə çıxış yolu kimi görürlər.
“Yolsuzluq” yalnız fiziki yolların yoxluğunu deyil, eyni zamanda ümidlərin, imkanların və gələcəyə inamın tədricən itirildiyi bir kəndin hekayəsini əks etdirir. Film ucqar kəndlərdə təhsil, infrastruktur və sosial bərabərsizlik problemlərini gündəmə gətirir.
Filmin rejissoru Səməd Ağayevdir.
