Lənkəranda peyvəndlənmə mövzusu üzrə təlim baş tutacaq. Bu haqda məlumatı Cenublu.az bu gün, 14 noyabr tarixində verir.
“Mifə yox, elmi sübutlara inanaq: Peyvəndlə bağlı biliklərin artırılması üzrə təlim” adı tədbir 17 noyabr tarixində təşkil olunacaq. Bu seminar “Heç bir uşağı peyvənddən kənarda qoymayaq” şüarı altında keçiriləcək.
Avropa İttifaqının maliyyə dəstəyi ilə Ümumdünya Səhiyyə Təşkilatı (ÜST), Azərbaycan Pediatriya Cəmiyyəti (AzPC) və Tibbi Ərazi Bölmələrini İdarəetmə Birliyi (TƏBİB) tərəfindən təşkil edilən tədbirin keçirilməsində məqsəd tibb işçilərinin və valideynlərin peyvəndlənmə ilə bağlı məlumatlılığını artırmaqdır.
Qeyd edək ki, tədbir Azərbaycan Respublikası Səhiyyə Nazirliyi və İcbari Tibbi Sığorta üzrə Dövlət Agentliyi ilə aparılan əməkdaşlıq çərçivəsində həyata keçiriləcək.
