Azərbaycan Avtomobil Federasiyası (AAF) Lənkəranda idman avtomobillərinin yürüşünü təşkil edəcək. Bu haqda məlumatı Cenublu.az bu gün, 9 iyun tarixində Qafqazinfo-ya istinadən verir.
Bakı - Lənkəran marşrutu üzrə keçiriləcək yürüş Heydər Əliyev Mərkəzinin qarşısında səhər saat 9:00-da başlayacaq. Yürüşdə Avtomobil Federasiyasından qeydiyyatdan keçmiş idman avtomobilləri iştirak edəcək.
Gözəl görüntüyə malik və hər zaman, xüsusilə də gənclər arasında böyük marağa səbəb olan idman avtomobillərini yürüşün başladığı məkandan - Heydər Əliyev Mərkəzinin parkından izləmək mümkün olacaq.
AAF tədbir iştirakçıları üçün iyunun 10-u və 11-də əyləncə xarakterli proqram da hazırlayıb. Belə ki, iyunun 10-da yürüşdən sonra Lənkəranda tədbirin açılış mərasimi və əyləncə proqramı təqdim ediləcək. İyunun 11-də isə iştirakçıların Lənkəranda çay plantasiyasına ekskursiyası olacaq. Yürüş iştirakçılarının hoteldə yerləşdirilməsi və asudə vaxtlarının proqramı AAF tərəfindən dəstəklənir.
Layihənin baş sponsoru Nazar Holdings, sponsorlar - Lamborghini Baku, Ferrari Baku, Lankaran Springs, Premium Bank, Karabakh Motors, GreenCar-dır.
