Lənkəran Regional Mədəniyyət İdarəsinin tabeliyində fəaliyyət göstərən Lənkəran şəhər Uşaq Rəssamlıq məktəbi Heydər Əliyevin anadan olmasının 100 illiyi münasibətilə rəsm sərgisi keçirib. Bu haqda məlumatı Cenublu.az bu gün, 21 fevral tarixində ARB Cenub-a istinadən verir.
Tədbirdə Lənkəran Regional Mədəniyyət İdarəsinin kollektivi, rəssamlıq məktəbinin müəllimləri, şagirdlər və valideynlər iştirak ediblər.
Əvvəlcə qonaqlar ümummilli liderin həyat və fəaliyyətinə həsr olunmuş rəsm sərgisi ilə tanış olublar. Qonaqlara gənc rəssamların ulu öndərə həsr olunmuş rəsm əsərləri haqqında ətraflı məlumat verilib. Çıxış edənlər ümummilli liderin bütün fəaliyyəti dövründə rəssamlara göstərdiyi diqqət və qayğının bu gün Prezident İlham Əliyev tərəfindən uğurla davam etdirildiyini vurğulayıblar. Tədris ilinin birinci yarımilliyində Lənkəran şəhər Uşaq Rəssamlıq məktəbinin yetirmələrinin respublika və beynəlxalq müsabiqələrdə əldə etdikləri uğurlardan danışılıb. Qeyd edilib ki, ötən il məktəbin 16 məzunundan 15-i Ali və Orta ixtisas təhsil müəssisələrinə daxil olub.
Tədbir zamanı respublika və beynəlxalq sərgilərdə iştirak edərək nailiyyətlər əldə etmiş şagirdlərə sertifikat və diplomlar təqdim edilib.
