Müdafiə Nazirliyi və Lənkəran-Astara Regional Mədəniyyət İdarəsinin birgə təşkilatçılığı ilə görkəmli hərbi xadim, iki dəfə Sovet İttifaqı Qəhrəmanı, tank qoşunları qvardiya general-mayoru Həzi Aslanovun xatirəsinə həsr olunan tədbir keçirilib. Bu haqda məlumatı Cenublu.az bu gün, 26 yanvar tarixində Azertac-a istinadən verir.
Əvvəlcə Lənkəran şəhərindəki Həzi Aslanov adına Xatirə parkı ziyarət olunub, unudulmaz qəhrəmanın abidəsi önünə əklil qoyulub, qərənfillər düzülüb və xatirəsi ehtiramla yad edilib.
Daha sonra Həzi Aslanov haqqında bir neçə kitabın və səhnə əsərinin müəllifi, Əməkdar incəsənət xadimi, Prezidentin fərdi təqaüdçüsü polkovnik Abdulla Qurbani qəhrəmanın həyat və şanlı döyüş yolu barədə ətraflı məlumat verib.
Tədbir iştirakçıları, eyni zamanda Həzi Aslanovun ev-muzeyini ziyarət ediblər.
Tədbirdə Həzi Aslanov adına Ordu İdeoloji və Mədəniyyət Mərkəzinin hazırladığı “Həzilər yurdunun qəhrəmanları” və Lənkəran şəhər musiqi məktəbinin təqdim etdiyi musiqi kompozisiyası maraqla qarşılanıb.
Əməkdar artist polkovnik Cahangir Qurbanovun ifa etdiyi “Böyük Zəfər” marşı ilə mərasim başa çatıb.
