Bu gün Azərbaycan Kinosu Günü qeyd edilir. Bununla bağlı sizə Azərbaycanın ilk səsli filmi haqqında olan məqaləmizi təqdim edirik:
“Ən mavi dənizin sahilində” filmi 1935-ci ildə Lənkəranın Sara adasında Boris Barnet və Səməd Mərdanov tərəfindən çəkilib. Filmin ssenari müəllifi Klimenti Mintsdir. Bəzi mənbələrdə filmin adı “Mavi dənizin sahilində” kimi də qeyd edilir [1,2].
Ekran əsəri Azərbaycanın ilk səsli filmi hesab edilir [2,3]. Dünya kinosunun 100 illiyi münasibətilə kinoşünaslar arasında keçirilən sorğuya əsasən, “Ən mavi dənizin sahilində” filmi dünya kinosunun ən yaxşı 12 əsəri siyahısına daxil edilib [2].
“Ən mavi dənizin sahilində” filmi komediya janrında çəkilib [3]. Film Yusif (Lev Sverdlin) və Alyoşanın (Nikolay Kryuçkov) başına gələn əhvalatlar haqqındadır. Hadisələr Sara adasındakı balıqçılıq sovxozunda baş verir.
Günlərin birində dostlar balıqçıların köməyinə gələrkən Xəzər dənizində tufana düşürlər və güclü dalğalar onların qayığını çevirir. Bu zaman yaxınlıqdakı kolxozun balıqçıları iki dostu xilas edirlər. Dostlar fəhlə qəsəbəsində qalıb işləyirlər və orada balıqçının qızı Maşenkaya (Yelena Kuzmina) vurulurlar. Bundan sonra onların arasında anlaşılmazlıqlar yaranır. Sonra isə məlum olur ki, Maşa xidmətdə olan həmyerlisini sevir və onun yolunu gözləyir.
“Ən mavi dənizin sahilində” filmi Mirzə Mustafayevin operator kimi kinoda ilk işidir [2].
Filmin 50 illik yubileyi Bakıda və Lənkəranda qeyd edilib. Filmin rejissor assistenti Məmməd Əlili xatirələrində qeyd edib ki, yubiley tədbirində Alyoşa obrazını yaradan Kryuçkov da var idi. O, filmin çəkilişləri ilə bağlı xatirələrini bölüşüb və 50 il əvvəl çəkilişlər zamanı Səməd Mərdanovun ona öyrətdiyi Azərbaycan xalq mahnısını da ifa edib [3].
7 may 2019-cu ildə bu film Azərbaycan Respublikasında dövlət varidatı elan edilən filmlərin siyahısına daxil edilib [2].
Ədəbiyyat:
