XVIII əsrin əvvəllərindən Lənkəranda bir neçə karvansara mövcud olub. Karvansaralar, adətən, onları tikdirən sahiblərinin adlarını daşıyırdı.
XIX əsrin sonlarında Lənkəran şəhərinin Böyük bazar hissəsində Şeyx İbad, Məşədi Hacıəli, Hacı Məcid, Kərbəlayı Səməd və s. karvansaralar var idi. Burada - indiki Həzi Aslanov küçəsində, həmçinin Molla Həsənin ikimərtəbəli karvansarası da mövcud idi [1].
Ümumilikdə Lənkəranda XIX əsrdə karvansaraların sayı təxminən doqquz olub. Onlardan yeddisi qamışdan, digərləri isə taxtadan və kərpicdən inşa olunmuşdur. Ehtimal olunur ki, taxtadan və qamışdan hazırlanmış karvansaralarda uzaq yerlərdən Lənkərana gələn və burada uzun müddət qalmaq niyyətində olmayan tacirlər qalırdılar. Kərpicdən olan karvansarada isə xaricdən Lənkərana gələn və uzun müddət burada ticarətini həyata keçirməyi planlaşdıran tacirlər qalardılar. Kərpicdən tikilmiş karvansaralar ticarət mallarının saxlanması üçün və yanğın təhlükəsizliyi baxımından daha etibarlı idilər [2].
Lənkərana alış-verişə gələnlər üçün karvansaralar dayanacaq yeri idi. Buraya gələnlərin heyvanlarını və yüklərini saxlamaq üçün karvansaraların böyük həyəti, yeməkxanası, anbarı, dükanları və s. vardı. Buraya gələn səyyahlar binanın üst mərtəbəsindəki otaqlarda dincəlirdillər [1].
Ədəbiyyat:
