Tez-tez ətrafımızda, marketdə, metroda, parkda və s. özünü yerə atıb, ağlayan, dayanmadan qışqıran, hətta valideyninə əl qaldıran azyaşlıları görürük. İstədikləri nəsə olmayanda və valideyn onlara “yox” deyəndə adətən bu yollara baş vurub, istəklərini həyata keçirməyə çalışırlar.
Bu hərəkətlərə qarşı müəyyən dərəcədə səbirli olmağa çalışan valideynlərlə yanaşı, uşağın bu davranışını daha da aqressivləşdirənlər də var. Uşaqların bu aqressiyalarının səbəbləri insanlar tərəfindən müxtəlif cür səciyyələndirilir. Məsələn, bunun ərköyünlükdən, izlədikləri cizgi filmlərdən, hətta yedikləri yeməklərdən belə irəli gəldiyini düşünənlər var.
Bəs əslində səbəb nədir?
Mövzu ilə bağlı Bizim.Media-ya açıqlama verən psixoloq Aynur İsmayılova uşaqların bu davranışlarını birbaşa valideynlərinin hərəkətləriylə əlaqələndirib:
“Məsələn, uşaq valideynin istədiyini etməyəndə valideyn onun üstünə qışqırır və yaxud aqressivləşib əşyaları ətrafa atır. Bu da uşağın ağlında qalır. O düşünür ki, inadlaşarkən bu hərəkətləri etmək lazımdır”.
Psixoloq vurğulayıb ki, uşaqların yaş dövrünə məxsus inadlaşmaq ayrı məqamdır və onu qırmaq olmaz.
Aynur İsmayılovanın sözlərinə görə, valideynlər ən çox öz hərəkətlərinə diqqət etməli, öz aqressiyalarını necə yönəltməli olduqlarını bilməlidirlər ki, uşaqlar da aqressiv böyüməsinlər:
“Yəni valideyn öz mental, psixoloji sağlamlığını qorusa, uşaqda heç bir aqressiv davranış müşahidə edilməyəcək”.
