Qulamrza Məhəmmədrza oğlu Qasımov 1883-cü ildə Lerik rayonunun Zenoni kəndində anadan olub.
O, ilk dini təhsilini Zenoni kəndində Molla Ağamalıdan alıb, sonra isə bir il Lənkəran şəhərində olan mədrəsələrdən birində oxuyub. Bir müddət keçdikdən sonra Şeyx Qələm İranın Ərdəbil, Xorasan və İraqın Nəcəf şəhərlərində təhsil alıb. Din xadimi Xorasanda 10 il oxuyub. Orada axund ustadları tərəfindən gözəl xəttə malik olduğuna görə ona "Qələm" ləqəbi verilib. 1923-cü ildə Şeyx Qələm Axund Azərbaycana qayıdıb.
1937-ci ildə Şeyx Qələm sovet hakimiyyəti tərəfindən dini fəaliyyətinə görə həbs olunsa da, əhalinin köməyi ilə azadlığa buraxılıb.
1960-cı illərdə axund müəllimliklə məşğul olub. Həmin zaman olan qadağalara baxmayaraq o, İslam elmini və şəriət hökmlərini tədris edib. Şeyx Qələm sonralar Zenoni kəndində məktəb və məscid açmışdır
Ümummilli lider Heydər Əliyev SSRİ Dövlət Təhlükəsizlik Komitəsinin sədri vəzifəsində işlədiyi zaman onun Kuveytdən gələn yüksək vəzifəli şəxslərlə görüşündə tərcüməçi qismində Şeyx Qələm Axund iştirak etmişdir.
Şeyx Qələm Axund 25 dekabr 1984-cü ildə 101 yaşında Lerik rayonunun Zenoni kəndində vəfat edib və vəsiyyətinə əsasən, kənddə onun köməyi ilə inşa edilən məscidin həyətində dəfn olunub.
Mənbələr:
