Bu gün iki dəfə Sovet İttifaqı Qəhrəmanı adına layiq görülmuş yeganə azərbaycanlı, Lənkəranın Gərmətük kəndində anadan olmuş Həzi Aslanovun doğum günüdür. Bununla bağlı Cenublu.az sizə qəhrəmanın həyatından bəhs edən “Sizi dünyalar qədər sevirdim” filmi haqqında məqaləni təqdim edir.
“Sizi dünyalar qədər sevirdim” filmi 1985-ci ildə rejissor Rasim İsmayılov tərəfindən lentə alınıb [1]. Bu ekran əsəri sovet kinematoqrafiya ustalarının ən yaxşı işlərinin siyahısına daxil edilib. Filmə ümumittifaq baxış keçirilmişdi [1]. Tankın adamın üstündən keçməsi trükü sovet filmləri arasında ilk dəfə bu filmdə tətbiq olunub [3].
Ekran əsərində hadisələr Birinci Pribaltika cəbhəsində cərəyan edir və axırıncı döyüş zamanı həlak olmuş Həzi Aslanovun ömrünün son günlərindən bəhs edir. Filmin çəkilişləri Bakıda, Moskvada və Minsk ətrafında aparılıb, çəkilişlərdə Belorusiya hərbi dairəsinin əsgərləri iştirak ediblər.
“Sizi dünyalar qədər sevirdim” filminin ssenari müəllifi Ramiz Fətəliyev, quruluşçu rejissoru Rasim İsmayılov, operatoru Valeri Kərimov, rəssamı Nadir Zeynalov, bəstəkarı Aqşin Əlizadə olublar. Həzi Aslanov rolunda 29 yaşlı Ramiz Novruz çəkilib. Bundan əlavə, filmdə general Mehmandarovu Şahmar Ələkbərov, Həzi Aslanovun həyat yoldaşını Gülnarə İbrahimova, Məmmədi Muxtar Maniyev, Həzinin anasını Nəcibə Hüseynova və digər aktyorlar müxtəlif rolları canlandırıblar.
31 avqust 1986-cı ildə “Admiral Naximov” paroxodunun “Pyotr Vasyov” yük gəmisi ilə toqquşması zamanı paraxodun kinozalında “Sizi dünyalar qədər sevirdim” filmi nümayiş edilirdi [2].
Ədəbiyyat:
