Filologiya elmləri doktoru, AMEA-nın N.Gəncəvi adına Ədəbiyyat İnstitutunun Ədəbi tənqid şöbəsinin müdiri, Azərbaycan Yazıçılar Birliyi və Azərbaycan Jurnalistlər Birliyinin üzvü, Əməkdar mədəniyyət işçisi Vaqif Yusifli Lənkəranda görüş keçirəcək. Bu haqda məlumatı Cenublu.az bu gün, 13 avqust tarixində AYB-nin Lənkəran bölməsinə istinadən verir.
Görüş 17 avqust saat 11:00-da Lənkəran şəhərində yerləşən Mərkəzi Kitabxanada (Dəmir yolu Vağzalının yanı) baş tutacaq. Giriş sərbəstdir.
Vaqif Yusifli 20 aprel 1948-ci ildə Masallı rayonunun Ərkivan kəndində anadan olub. Orta məktəbi bitirdikdən sonra, ADU-nun filologiya fakültəsinə daxil olub. Daha sonra Masallı rayonundakı orta məktəblərdə dil-ədəbiyyat müəllimi işləyib. 1975-ci ildə Azərbaycan Milli Elmlər Akademiyası Nizami adına Ədəbiyyat İnstitutunun əyani aspiranturasına daxil olub, 1979-cu ildə namizədlik dissertasiyasını, 2011-ci ildə doktorluq dissertasiyasını müdafiə edib.
3000-ə qədər elmi məqalənin müəllifidir. Məqalələri Azərbaycanın hüdudlarından kənarda - Türkiyədə, Almaniyada və İranda çap olunub.
O, 2018-ci ildə İlham Əliyevin Sərəncamı ilə "Tərəqqi" medalına layiq görülüb.
