Sabir Qənbər oğlu Cümşüdov 5 may 1936-cı ildə Astara rayonunun Motalayataq kəndində anadan olub. Yazıçı Sabir Cümşüd təxəllüsü ilə tanınır.
O, 1943-1946-cı illərdə Lerik rayonunun Vov kənd məktəbində, 1946-1949-cu illərdə Lerik rayonunun Daster və Siyov kənd məktəblərində, 1949-1951-ci illərdə isə Astara rayonunun Pensər kənd orta məktəbində oxuyub [1]. Cümşüdov 1953-1958-ci illərdə indiki Azərbaycan Texniki Universitetinin (AZTU) mexanika fakültəsində təhsil alıb [2].
Sabir Cümşüdov 1958-1962-ci illərdə Respublika Avtomobil Nəqliyyatı Nazirliyinin avtotəsərrüfatlarında müxtəlif vəzifələrdə çalışıb [1]. O, 1965-1980-ci illərdə AZTU-da müəllim kimi işləyib [1]. Yazıçı 1980-ci ildən AZTU-nun Xidmət sahələrinin iqtisadiyyatı və menecmenti kafedrasında çalışıb [2]. Bundan əlavə, o, 2002-ci ildən Azərbaycan Respublikası Prezidenti yanında Dövlət İdarəçilik Akademiyasında elmi-pedaqoji fəaliyyətini davam etdirib.
Cümşüdov 1965-ci ildə texnika elmləri namizədi alimlik dərəcəsini alıb, 1971-ci ildə isə iqtisad elmləri doktoru alimlik dərəcəsinə layiq görülüb.
Yazıçı ədəbi fəaliyyətə 1976-cı ildə “Azərbaycan gəncləri” qəzetində dərc olunmuş “Yaylaqlar” şeiri ilə başlayıb. Bu tarixdən başlayaraq onun müxtəlif şeirləri, məqalələri, hekayələri dövrü mətbuatda çap edilib. Cümşüdovun bir çox şeirlərinə mahnılar bəstələnib. Onun əsərləri sırasında “Məhəbbət ülviyyəti”, “Kamillik zirvəsi”, “Göyün çıraqları”, “Bahar nəfəsi”, “Günəş damcıları”nı qeyd etmək olar [1].
Sabir Cümşüdov Əli Mirəliyevin “Yaraşaydım” və “Oynadı qızlar”, Faiq Ağayevin “Dözmərəm sənsiz” və Azərinin ifa etdiyi “Səni əzizlərəm” mahnılarının sözlərini yazıb [4,5,6,7].
Sabir Cümşüdov 350-dən artıq elmi əsərin, həmçinin 2 monoqrafiyanın müəllifidir [2]. Yazıçı ali məktəblərin bir neçə elmi-texniki konfranslarında məruzələrlə çıxış edib. O, 1979-1991-ci illərdə keçmiş SSRİ ali təhsil sisteminin üzvü olub. Sabir Cümşüdov “Lenin” və “Tərəqqi” medalları ilə təltif edilib [1,3].
Ədəbiyyat:
