Şıxımpeştə kəndi Astara şəhərindən 40 km şimal-qərb istiqamətində, Peştəsər silsiləsinin ətəyində yerləşir [1]. Kənd, həmçinin “Şıxınpeştə”, “Şıxonpeştə” və “Şıxapeştə” də adlandırılır [2].
Alim Budaq Budaqovun yazdığına əsasən, “Şıxımpeştə” söz birləşməsi talış dilində olan “şıx” (şeyx) və “peştə” (təpə) hissələrindən ibarətdir, yəni yaşayış yerinin adı “şeyxlərin təpəsi” deməkdir [1,3]. Yazıçı Musarza Mirzəyevin fikrincə, kəndin adı “şeyxlərə məxsus torpaq sahəsi” mənasını daşıyır [2].
Şıxımpeştə kəndinin əvvəlki adı İrşadiyyə olub. Yerli əhalinin sözlərinə görə, kənd İranın Minavar kəndindən gəlmiş Hacı Şeyx adlı bir şəxs burada məskunlaşdıqdan sonra İrşadiyyə adlandırılıb. “İrşadiyyə” sözü “doğru yol göstərən” və ya “doğru yola çəkən” anlamını verir [1].
Əhali, əsasən, heyvandarlıq, əkinçilik və arıçılıqla məşğuldur [5].
1915-ci ilə aid olan siyahıyaalınma məlumatına əsasən, Şıxımpeştə (Şıxapeştə) kəndində 28 nəfərin yaşadığı qeyd olunub [4]. 2019-cu ilin statistik göstəricilərinə əsasən, bu kənddə 250 nəfər yaşayıb [5].
Ədəbiyyat:
