Ramazan Hacı Fərrux oğlu Eminbəyli 1946-cı ildə Masallı rayonunun Eminli kəndində anadan olub.
O, təhsilini Eminli kənd yeddiillik məktəbində almış, sonra isə Masallı şəhər Nəriman Nərimanov adına 2 saylı orta məktəbdə davam etdirmişdir [1]. Eminbəyli 1965-ci ildə indiki Bakı Dövlət Universitetinin (BDU) fizika fakültəsinə qəbul olmuş, 1970-ci ildə təhsil müəssisəsini bitirmişdir. Həmin il Ramazan nəzəri fizika ixtisası üzrə aspiranturaya qəbul olmuşdur.
Ramazan Eminbəyli 1974-cü ildən BDU-da fizika fakültəsi Bərk cisimlər fizikası kafedrasında çalışıb. O, 1996-cı ildə Türkiyədəki universitetlərin birinin dəvəti ilə oraya yollanaraq, ömrünün sonuna kimi həmin təhsil müəssisəsində işləyib [2].
Alim 1997-ci ildə Türkiyədə “Müxtəlif səth potensiallı yarımkeçirici löhvələrdə kinetik effektlərin Kvant nəzəriyyəsi” mövzusu üzrə doktorluq dissertasiyasını müdafiə edib və fizika-riyaziyyat elmləri doktoru alimlik dərəcəsini alıb. Bununla əlaqədar Eminbəyli dünyanın bir çox alimləri ilə, o cümlədən Amerikanın İndiana ştatından İ.Kirmer, rumıniyalı D.Antonion, polşalı Z.Mariya, alman A.Santiski ilə əməkdaşlıq edib [1]. Onun elmi əsərləri dünyanın bir çox aparıcı elm mərkəzlərində, həmçinin Moskva, Sankt-Peterburq, Kiyev, Riqa və digər şəhərlərdə tanınır.
Ramazan Eminbəyli 27 avqust 2011-ci ildə vəfat edib [2].
Ədəbiyyat:
