Müqəddəs Olqa kilsəsi Cəlilabad rayonunun Göytəpə şəhərinin cənub-şərqində, Göytəpə çayının sağ sahilində yerləşir. Məbədin təməlqoyma mərasimi 30 aprel 1868-ci ildə Rusiya İmperatorunun Qafqazdakı canişini Mixail Romanov və onun həyat yoldaşı Olqa Fedorovnanın iştirakı ilə baş tutub [2]. Kilsənin tikinti işləri 1869-cu ildə başa çatıb [1]. Lakin tikilinin üzərində olan kiçik kitabçada onun 1878-ci ildə inşa olunduğu yazılıb.
Kilsənin ərazisində əvvəl digər bir məbəd olub. Həmin kilsə 1864-cü ildə fəaliyyət göstərməyə başlayıb, lakin onun yerində sonradan Müqəddəs Olqa kilsəsi tikilib [3, 4].
Müqəddəs Olqa kilsəsi bu ərazilərə 1828-ci ildən sonra köçürülən rus ailələri üçün tikilib. Məbəd yerli ustalar tərəfindən qırmızı kərpicdən inşa edilib. Kilsənin çöl divarları hər tərəfdən xaçı xatırladır. Tikilinin pəncərə və qapıları taxtadan tağvari formada hazırlanıb. Məbədin pəncərələri şəbəkəlidir. Kilsənin altı günbəzi var. Müqəddəs Olqa kilsəsi bir böyük və bir neçə kiçik ibadət otaqlarından, həmçinin zəng qülləsindən ibarətdir.
Kilsədə gizli yeraltı yol mövcuddur. Bu yeraltı yol vasitəsilə kilsənin keşişi öz evinə gedirmiş [5]. Lakin uzun müddət istifadə olunmadığı üçün yeraltı yol uçub [6].
Sovet dövründə kilsə hökumət tərəfindən bağlanıb. 1990-cı illərdə burada yaşayan bir çox rus ailələri Göytəpəni tərk edib, Rusiyaya qayıdıblar. Bu hadisədən sonra kilsədə hər hansı dini mərasimlər keçirilmədiyindən tikili Azərbaycan Respublikasının Mədəniyyət Nazirliyinin tabeliyinə verilib [5].
Müqəddəs Olqa kilsəsi hazırda kitabxana kimi fəaliyyət göstərməsinə baxmayaraq, yararsız vəziyyətdədir [5].
Ədəbiyyat:
